حكاية حياة الفصل الرابع عشر

 بقلم: سمير الشحيمي

أنا أريد أطلع مصعب من المستشفى أحسن له بالبيت وسط أهله

جمله قالتها أصيلة لمدير المستشفى والدكتور المشرف على الوضع الصحي لمصعب. 

الدكتور : بس وضعه الصحي مايسمح إنه يطلع من هنا وهو مازال بغيبوبته. 

أصيلة : راح أجهز له غرفة خاصة بجميع معداتها الطبية. 

الدكتور : بس بعد ما يغني أن الأفضل له أنه يكون معانا بالمستشفى. 

أصيلة : من كم يوم خبرتكم بسفره برا للعلاج قلتوا إنه حالته الطبيه ما تحتاج وهو في غيبوبه اللحين من شهر ومافي شي جديد.

مدير المستشفى : ومحتاجه فريق طبي عندج بالبيت يتابعون حالته أو أقل حاجه ممرضه.

أصيلة : نسيت إنته أن بنتي ضحى وزوجة ولدي سندس ممرضات وراح يباشرن على حالته وراح أجيب ممرضه خاصه تكون ترعاه.

الدكتور : ماعرف شو أقولك.

أصيلة : ماله داعي تفكر عطني الموافقة. 

مدير المستشفى : خلاص خليهم يسوون اللي يبونه وهم يتحملون مسؤولية مريضهم.

أصيلة : نحن مسؤوليين والمريض إسمه التاجر مصعب. 

الدكتور : خلاص راح اعطيكم الموافقة لخروج مصعب ؛ متى راح تجوون تاخذونه؟ 

أصيلة : من تجهز الغرفة بجميع المعدات الطبية اللي يحتاجها راح نجي ناخذه. 

مدير المستشفى : وسيارة الإسعاف علينا ولا يهمك أم نايف.

فيلا مصعب 

حياة في غرفة المعيشة ومعها صديقتها ميره : افتقدتج بالجامعة والبنات يسألن عنك والأساتذة وكلهم يسلمون عليك. 

حياة : فيكم الخير والبركة حبيبتي. 

ميره : متى راح ترجعي الجامعة ترا وااايد محاضرات راحن عليك. 

حياة : والله من بعد طيحة أبوي صار مالي بارض وخاطر لأي شي بس أريده يقوم بالسلامة لنا. 

ميره : بس هاي دراستك ومستقبلك حبيبتي حياة ولو عمي مصعب يعرف شو تسوي بنفسك كان بيزعل عليك. 

حياة : هو يقوم من غيبوبته وينازعني وراضيه حتى يضربني بس أهم شي يكون بخير وعافية. 

ميرة : كيفها معاك عمتك أصيلة؟ 

حياة : من بعد طيحة أبوي مصعب أستوت الآمر الناهي بالبيت وفي الشركة ، تخيلي حتى السيارة سحبتها عني قالت تبي تروحي مكان يشلك السايق. 

ميره : شو هاي جنت ما أظن صاحيه إلا أستخفت بعد ؛ السيارة من عند العم مصعب.

حياة : والله شو أقولك صارت قويه بزيادة وما أقدر عليها وأبوي مصعب هو اللي كان يحامي عني ويدافع.

ميره : ما قول غير كان الله في عونك حبي.

حياة : الحمدلله على كل حال.

ميرة : أمسكي هاي الملخصات مال المحاضرات اللي فاتتك الشهر ونتريا رجعتك بسرعة للجامعة حبي.

حياة : تسلمين يا أغلى وأعز صديقة وأخت بحياتي.

شركة فارس لتجارة

فارس خلف مكتبة يرن هاتفه اتصال من مدير المخازن التابعة لشركته : هلا العم فارس كيف الحال؟

فارس : اهلين وسهلين طمني كيف الشحنة اللي بمخازن شركة مصعب عساكم خلصت لأن الشركة بصحار تنتظر البضاعه توصل مخازنها المسا.

مدير المخازن : لا والله للحين معرقلينا طال عمرك.

فارس : كيف معرقلينك ماحملتوا البضاعة للحين ترا الشحنة مب شويه محتاجه 4 شاحنات وأنا موقف كل شي هاليوم عشان هاي البضاعة توصل من دون تأخير.

مدير المخازن : والله هذا اللي صار لما كلمت مدير مخزنهم قال هاي أوامر من إدارة الشركة إنه لازم ندفع 50 ألف ريال مستحقات الدفع من 6 شهور.

فارس : شو هاي المهزله اللي حاصله صكر بشوف كيف الأمور.

رفع السماعة مرة أخرى واتصل على شركة مصعب وتحدث مع السكرتيرة شيماء ترد عليه : هلا أستاذ فارس.

فارس : شيماء شو هذا اللي سمعته اللحينه متصل علي مدير المخزن مالي يقول معطلينه بمخازنكم عن التحميل ليش؟

شيماء : أستاذ فارس أبي منك العذر والسموحة بصراحة بالفعل هذا اللي صار لأن في مبلغ مستحق الدفع لازم تدفعه شركتك بعدين تقدرون تحملون بضاعتكم.

فارس : هالموضوع أعرفه ومتفاهم مع مصعب الله يقومه بالسلامة وبدفع مع الوقت.

شيماء : أنا عارفه والله  بس هاي الأوامر جايه من أم نايف المديرة الحاليه.

فارس : وهيه أم نايف ماتعرف أن البضاعة لشركتي؟

شيماء : عارفه وكلمتها وقلت حقها أن شركة فارس وشركة مصعب عندهم معاملات خاصه ومتفاهمين على كل شي ؛ قالت لي مالك دخل عليك تنفذي وتعطي تعليمات للمخازن.

فارس : حوليني عليها اذا هيه بالمكتب.

شيماء : لا والله للإسف طالعه.

فارس : خلاص راح أكلمها بتلفونها. 

صكر الخط

أصيلة بالسيارة وهيه متجهه لبيت شذا يرن هاتفها فارس يتصل عليها ردت وهيه تبتسم ابتسامه دهاء وخبث : هلا هلا بالتاجر فارس مرحبا وسهلا.

فارس : اهلين أصيله كيف الحال.

أصيلة : بخير لله الحمد تفضل آمرني.

فارس : شو اللي مسوتنه أنتي مع القرارات الجديدة اللي منزلتنها؟

أصيلة : أي قرارات ماعرف عن أي شي.

فارس : عن الاستعباط أم نايف أنتي عاطيه أوامر أنه مايتم تخريج وتحميل البضاعة اللي بمخازنكم اللي هيه تبع شركتي إلا من ندفع المبالغ المستحقة السابقة؟

أصيلة : نسيت تصدق اسمحلي والله بس صحيح الكلام أنا عاطتنهم الأوامر بصراحه راجعت ملفات الشركة لقيت في مبالغ خارجية مستحقة لشركتنا وأنت ما دفعت.

فارس : أنا ومصعب الله متفاهمين على كل شي وأنا أدفعله كل نهاية سنة مبالغة كاملة.

أصيلة : كلامك على عيني وراسي بس مصعب الله يقومه بالسلامه يارب بغيبوبه من شهر وأنا اللي أدير الشركة حالياً فلابد انك تدفع مبلغ اللي عليك وفالك طيب.

فارس : يا أم نايف ترا هاي البضاعة مستعجل عليها ولا راح أدفع غرامة تأخير وأنا ما عندي سيوله أدفع المبلغ كامل حقك فهمي والبضاعة اليوم لازم تطلع وتوصل لأصحابها.

أصيلة :كان ودي أساعدك بس ما أقدر مثل ماعليك أنت اللتزامات حتى نحن علينا اللتزامات.

فارس : واللحين كيف؟

أصيلة : لازم تدفع مافي غير هالحل وعشان العشره والمخوه بينك وبين مصعب زوجي الله يقومه بالسلامه أدفع 20 ألف ريال والباقي بعد شهر من تاريخ اليوم كذا أنا عداني العيب.

فارس : هو من ناحية عداك العيب عداك هيه نعم خلاص المبلغ باكر بيكون معاك بالمكتب.

أصيلة : كذا أنت صح وأمورنا بالسليم اللحين بخبرهم يفرجون عن بضاعتك.

صكرت الخط وهيه تضحك وتقول : والله لا اوريكم واحد واحد اتصلت على شيماء : الو شيماء اتواصلي مع المخازن خلاص خليهم يسمحون لشركة فارس لتجاره بتحميل بضايعهم وبعد العمال اللي معانا يساعدونهم حرام وايد أخرناهم يالله.

أغلقت الخط وفي عينها شر وخبث يستطير.

يتبع...