حكاية حياة .. الفصل الثاني

بقلم سمير الشحيمي

المول 

أصيلة وصديقتها المقربة شذا تتسوقان بالمول قالت شذا : حصلت قطعة خام(قماش) تجنن في المحل الثاني بنسير نشتريها. 

أصيلة : تمام بس بعدها بنسير محل الذهب فخاطري أشتري خاتم جديد. 

شذا : ما يمنع ليش لأ.

 منتجع السلام

 مصعب وصل قاعة المؤتمرات للإجتماع بالوفد الكوري ومعاه السكرتيرة شيماء. 

مصعب باللغة الإنجليزية : You are most welcome. We are honored to have you here in your second home, the Sultanate of Oman, and specifically in the Wilayat of Al Buraimi (هلا فيكم شرفتونا بزيارتنا في بلدكم الثانية سلطنة عمان وتحديداً في ولاية البريمي).

رئيس الوفد الكوري : Welcome, Mr. Musab. I have been looking forward to meeting you for a long time (أهلا وسهلاً بك سيد مصعب كنت أطوق اللقاء بك منذ فترة طويلة).

مصعب :  "So, let's start the meeting." (فلنبدأ الإجتماع إذا).

مكتب حيدر في وزارة التربية والتعليم ينهي أعماله المكتبية وزميله بالمكتب محمد يحدثه قائلا : كيف تتوقع هاي السنة في ترقيات؟ 

حيدر : تعرف أن الترقيات موقفة من زمان من 2012 ليش تجلس تفكر بالترقيات اللحين خليها لزمن؟

محمد : لو حصلنا ترقياتنا على أثر رجعي تعرف كم بيوصل راتبي؟ راح تنحل مشاكلي الماليه مب كلها بس بيخف من ظهري حمل كبير.

حيدر : عسى ينزل قرار ونحصل على ترقياتنا. 

محمد : الصغارية صدعه وطلباتهم وطلبات مدارسهم والبيت وزوجتي أثير طلبات ماتخلص أحس راسي بينفجر. 

حيدر : تجلس تفكر لازم بيصدع راسك ؛ وكل أمرك لله سبحانه بتتيسر. 

محمد : والنعم بالله أقولك حيدر بحصل عندك سلف؟ 

حيدر يناظر محمد ثم قال : الأسبوع الماضي عاطنك والشهر الماضي هم عطيتك وبعدك مارجعتهن. 

محمد : أنت عارف وضعي برجعهن بس أنتظر فلوس الجمعية الشهر الجاي ينزلن برجعلك كل ريال خذيته منك وعد. 

حيدر يخرج محفظته من جيبه ويضع مبلغ على الطاولة : هذا اللي معاي ماشي غيرهن وربي يسهل أمرك. 

محمد بفرح : والله إنك صديق كفو وينشد فيه الظهر مشكور حبيب قلبي الله يفرج عليك.

المستشفى 

سندس ممرضة في المستشفى بعيادة الأسنان تنادي على إحدى المرضى ليدخل على الطبيب فقالت زميلتها تهاني : ها كيف مافي مراجعين اليوم كثير؟

سندس : من قال بعده الوقت متعودين من بعد الساعة 10 تستوي زحمه تقول متفقين مع بعضهم بعض.

تهاني : أنتي صادقة البنات بالقسم الثاني طالبين أكل من المطعم إذا بعدج ماتريقتي روحي تريقي معاهم. 

سندس : متريقه وخالصة ماريد أثقل بالأكل بطلع أتغدا اليوم مع زوجي من بعدها بنسير السينما. 

تهاني : هالله هالله حلو ياحلو. 

سندس : في عقد ذهب عجبني بسوق الذهب وأبي زوجي يشتريه. 

تهاني : هو كريم وأنتي تستاهلين ؛ صحيح وينها ضحى أخت زوجك ماشوفها اليوم؟

سندس : موجوده بعيادة العيون تغطي مكان أحد الممرضات.

تهاني : أوك ، بشوف الدكتور إذا فضى عشان أدخل البيشن معاه.

البنك

 نايف موظف بالبنك يخرج من مكتب مدير البنك ويعود إلى مكتبه ويحدثه زميله بالمكتب يدعى طارق : شكله المدير عاطنك شغلك من المنازع باين على وجهك. 

نايف بغضب : أنا مراجع أرقام المبالغ اللي يودعها العملاء بس هو يقولي في أخطاء ولازم أدقق أكثر.

طارق : عدل علاقتك مع المدير وبترتاح لأنك وااايد تراده وتعرف في مدراء يبون يكونو هم الصح دائماً.

نايف : أقول خلني أخلص هاي الأوراق وراجعهن لأنه يبيهن ضروري قبل نهاية الدوام.

طارق يرفع سماعة هاتف المكتب : بطلب فنجان قهوة حقنا عشان تفتح مخك شوي. 

نايف : زين ماغلط.

الجامعة 

مزن تخرج من المحاضرة ومعاها صديقتها أفنان وتحدثها : الدكتور مدحت وايد يطول بمحاضراته يملل.

أفنان : بالعكس أنا أرتاح لمحاضراته.

مزن : عشتوا مالت عليج أنتي وياه.

أفنان : مالت عليج أنتي قومي نسير الكافتيريا ناكل لنا شي جوعانه.

مزن : قبل المحاضره ماكلين أنتي الأكل وين تودينه.

أفنان : هنا يروح بالمخ وتركيز على المحاضرات.

مزن : حسستيني يا (اينشتاين) بحصلج بجامعة بوسطن تكملي دكتوراة ، حدك راح تكوني تشتغلي بشركة.

أفنان : ليش لا ؛ كل شي بيصير مع الإصرار والعزيمة. 

مزن : قومي نسير الكافتيريا لما تكوني جوعانه تحلمي وايد.

أفنان : شوفي هاي أختك حياة خليها تجي معانا.

مزن : ويع انتي بعد لاتقولي أختي وبعدين ماداني ربيعتها الملقوفه (ميره ) سرنا سرنا لا طالعيهن وايد.

توجهتا مزن وأفنان للكافتيريا ؛ بالجهة المقابلة تقف حياة مع صديقتها ميره قالت حقها : هاي أختج مزن واايد شايفه نفسها.

حياة : شو تبي فيها خليها على راحتها.

ميره : بس صدق أنتي غير عنها بوايد برغم انكن خوات.

حياة : هيه مب أختي أختي بس عايشين بنفس البيت.

ميره :أيوه خبرتيني بس العم مصعب أبوج.

حياة : هو اللي رباني وتبناني وسجلني بأسمه بس هو مش أبوي وأنا بنت يتيمة.

ميره : دام إنج مسجلة إنك حياة بنت التاجر مصعب أنتي تعتبرين بنته ولا تخلي هالشي يفارق راسك وأنتي الأساس مب مزن وإخوانها.

حياة : أقول أنتي فاضية قومي نراجع قبل عن تبدأ المحاضرة الثانية.

ميره : أوف منج.

منتجع السلام 

مصعب مع الوفد الكوري يتناولون وجبة الغداء ومن ثم ترك الوفد يرتاح ، وخرج مصعب من المنتجع وتصادف مع صديقه المقرب القديم فارس وقال له : هلا والله فارس ما شاء الله أشوفك هنيه.

فارس : هلا فيك مصعب أيوه عندي ضيوف من قطر نازلين بالمنتجع وجاي عندهم نتغدا من بعدها اجتماع  عمل بخصوص المشروع اللي كلمتك عنه.

مصعب : قصدك مشروع المول الجديد اللي حاب تفتتحه في النفحات؟

فارس : أيوه هوه ؛ وأنت كيف أمورك؟

مصعب : توني مخلص إجتماع مع الوفد الكوري والأمور طيبة.

فارس : شو رايك نتلاقى المسا؟

مصعب : بكون مشغول خليها بكره شو رايك؟

فارس : بس تمام يالله مع السلامه.

المول

بالسينما نايف وسندس وانتهى عرض الفيلم  فقال سندس : بصراحه فيلم ولا أروع.

نايف : بالفعل عجبتني قصة الفيلم أول مر أشوفها.

سندس : حبيبي ممكن اطلب منك طلب؟

نايف : أطلبي تدللي.

سندس : حياتي أنت ؛ حصلت خاتم وايد يجنن بسوق الذهب وخاطري اشتريه.

نايف : اشتريه شو مانعك؟

سندس : أريدك تأخذه حقي.

نايف : عندك راتبك اشتريه ؛ تعرفي عندي اللتزامات كثير ومن شهرين كنت مشتري حقج عقد ذهب بقيمة 1000 ريال.

سندس : يعني ما أستاهل إنك تشتري الخاتم حقي وتدلعني ؛ أنتي تعرف راتبي مايكفي حق أقساط السيارة والبترول ومصروف الدوام ومستلزماتي الخاصة من صالون وملابس.

نايف : عيل ماله داعي للخاتم وخليه يمكن بعد فترة نشتريه أما اللحين صعبه.

سندس : يرضيك ان صديقاتي كل وحده زوجها جايب لها هدية حلوه وأنت ماتبي تهديني خاتم ومب غالي والله بس 400 ريال

نايف : سندس غيري الموضوع لأن صدق ماعندي وفي شي أهم من الخاتم.

سندس : شو اللي أهم من الخاتم تبي تزعلني يعني أنت ليش كذيه.

نايف : يالله بس خلاص بنتفاهم بعدين.

سندس : رجعني البيت.

يتبع...